المساعد الشخصي الرقمي

مشاهدة النسخة كاملة : ساهر نسائي



عطارد
09-24-2010, 06:23 PM
نظام ساهر النسائي ( وليس ساهر المروري )

هذا الإسم الذي أطلقه صاحبي على زوجتيه ( إذ هو متزوج ثنتين )
زارني ليلة البارحه إثنان من أصحابي كلاهما لديه زوجتان
فكنا نتجاذب أطراف الحديث ومررنا على التعدد وطبيعة البيئة التعددية
هما يتكلمان بحرقة ومن معاناة بحكم أنهما معددان وأما أنا فموحد لأن الله يحب الموحدين ( .... ) كنت استمع لحديثهما حول طرائف وغرائب القصص مع هؤلاء النساء وبين برهة وأخرى تقرع أجراس جواليهما فيرد الصاحب الأول أنا عند عطارد ... طيب شوي واجي ... لا مانا متأخر ... طيب ابشري ... ( ما معنا أحد إلا المقرود رقم 2 ) ثم يقوم من عندنا إلى ناحية المجلس جاعلا ظهره إلينا ووجهه إلى الحائط ... ( الظاهر إنه يتلقى العين الحمراء ... ما يبي نسمع صوت ولا انفعالات وجه ) ثم يقرع جرس جوال الآخر ... نعم أنا عند عطارد ... بس أنا واياه ( والمقرود رقم 1 ) ... شوي واجي ... لا يابنت الحلال ماني متأخر ... طيب لحظه ... ( عن اذنكم شوي ) - يختفي قليلا في حوش الرجال ( يميطه روحة وجيه ) ... ثم يعود وهو يخرج من صدره نفسا مصحوبا بتأوه ... قلت له خير ... قال هالحريم ...
خلن اسولف لك سالفة ( ساهر ) قلت وشي بعد ساهر هذي سالفتن جديده ... تفضل .. قال انا قبل البارح كنت جاي من الرياض على سيارتي ومعي رجال شرواكم ... شرواك الطيب ... ويوم وصلت حول الغاط يوم دقت الأولى ( يعني الزوجة الأولى ... اللي عنده الليله ) يقول عاد حاط بجوالي كل وحده له نغمه ... المهم دق الجوال ( اللهم عليك بمن آذى المسلمين ... ) هذي نغمة الأولى ... هلا بالغاليه ( وزززززز ) ... هلا بالطربه ( وززززززين ) وشلونكم ... الحمد لله ... ما معي الا ابو فهد ... ايه بس ... والله بالغاط هالحين ... ايه تونا نازلين من الطلعه الطويله حقت الغاط ... (( ابي أفتح لكم السبيكر نسمع الأولى اللي عنده الليله هذي وش تقول )) ... وين بالغاط . الله توكم تاصلون الغاط ... ايوالله تونا ناصل الغاط ... متى انتم طالعين من الرياض ... حول الساعة ثمان ... ثمان . تسع . ونص . هالحين لكم ساعه ونص ... وش هالمشي تدبون دبي ... لا يابنت الحلال بس ما نقوى نسرع على الطريق رادار ... ليه وين كاشف الرادار اللي جبت لك ( أخسي المره متطوره ) ... نسييته بحايل ... ماش ما تمشون أكيد انك فاتحن افمك مع ابو فهد تهلقون . وتدبون دبي ... لا والله الا امشي ميه وعشرين ... بس ميه وعشرين وين اللي لا صرنا معك صلقعت بنا بين السماء والأرض ... ان شاء الله ما نبطي ناصل ... ايييييه مع السلامه ... طوط .... ( هذي بس لذعات على الهواء مباشرة لجل يحطه على الطبلون ويطير بين السماء والأرض )
أبو فهد : من هذي ... هذي المره يابو فهد ...أيهن .. الأولى يابو فهد ... ياحبيبتي شكله خايفتن عليك ... يا حبيبي إنت يا بو فهد
( اللهم تقبل من واغفر لنا وارحمنا ) هذي نغمة جوال الثانيه ( اللي الليله ما هو عنده ) ... هلا عليكم السلام ... مشغول جوالي قبل شوي أكلم لي رجال ... رجال موصينن على له معامله بالرياض (( نبي نفتح السبيكر . نسمع وش تقول الثانيه اللي الليله ما هي عنده )) إيواه تقولي معامله وين ... معامله بالخارجية حقت عمال ... ومن معك ... معي ابو فهد ... حليلكم ... وين وصلتوا ... تونا تعدينا الغاط ... حليلكم ... متى طلعتوا من الرياض ... الساعة ثمان ... ثمان . تسع . ونص . لكم ساعه ونص ... والله مسرعين على هوينكم الله يستر ينتق عليكم بعير بهالخط ... ولا يضرب عليكم كفر ... لا ان شاء الله ... اشوى لا صار معك ابو فهد يونسك ... ايوالله نسولف ومعنا ترامس هالقهوة والشاهي نمشي ونتقهوى ... وشو له ايقفوا بالطريق وتقهوو وكان بكم نوم نيموا ... لا مابنا نوم ... ما يخالف نيموا اريح لكم ... كيف نسيت اوصيك تجيب لي من الرياض مكسرات من باجا ... ليه ما قلتي لي ... ايه ليا جيت القصيم مر وجب لنا ... اخاف مسكر ... لا ما يسكر . ليا جيت القصيم دق على اوصف لك ... بعيد هو عن الطريق ... لا قريييب جيته مع اهلي العام يوم نروح ... طيب مع السلامة ... طوط
هذا ساهر ياعطارد

ساهر نسائي على كيف كيفك
يتتبعك وين مارحت ( آآآآآه )

لا ووحده تطيرك ووحده تهديك ... حاله ياعطارد ... هالحين هاللي وحده تقول اسرع ووحده تقول نم ... هذولن لأجل راحتي هذولن يتناحرن ويتشاجرن بي حاطاتن حلبة مصارعة

الله يعين أقسم بالله لو دريت إن السالفه هاللون ما خذيت الثانية
( هذه قصة حقيقية مع تحفظي على مسألة التعدد من الناحية الشرعية )



عطارد

ابراهيم الواكد
10-04-2010, 03:58 AM
الله يعطيك العافيه

الدبلي
10-04-2010, 05:39 AM
الله يعطيك العافيه

ήάṥṧéя
10-06-2010, 04:36 PM
الله يعين ^__^

هع هع

اي والله ساهر نسائي

مشكور يا عطارد

سويق الضبعه
10-16-2010, 08:37 AM
هههههههههههههههههههههههههه
الله يعطيك العافيه